Koreyada ilg‘or agrotexnologiyalar va xalqaro hamkorlik istiqbollari o‘rganildi

Janubiy Koreya Respublikasining ilg‘or agrotexnologiyalarini o‘rganish, qishloq xo‘jaligining turli yo‘nalishlaridagi zamonaviy tajribalarni O‘zbekiston sharoitida amaliyotga tatbiq etish hamda xalqaro hamkorlikni yangi bosqichga olib chiqish maqsadida Janubiy dehqonchilik ilmiy-tadqiqot instituti direktori Diyor Jurayev Koreya Respublikasida xizmat safarida bo‘ldi.

Xizmat safari davomida Koreyaning bir qator hududlarida qishloq xo‘jaligi, oziq-ovqat sanoati, ozuqa ishlab chiqarish, dorivor o‘simliklar, urug‘lik kartoshka hamda qo‘ziqorinchilik yo‘nalishlarida faoliyat yuritayotgan yetakchi tashkilot va korxonalar faoliyati yaqindan o‘rganildi.

Jumladan, “Meat Processing Company” korxonasiga tashrif davomida go‘shtni qayta ishlash, mahsulot sifatini ta’minlash, ishlab chiqarish jarayonlarini zamonaviy texnologiyalar asosida tashkil etish hamda tayyor mahsulotlarni saqlash va qayta ishlash tajribasi o‘rganildi.

Shuningdek, “Sprout Ginseng Farm” xo‘jaligida jenshen yetishtirishning zamonaviy usullari, yetishtirish texnologiyasi, mahsulot sifatini ta’minlash hamda ishlab chiqarish jarayonlarini samarali tashkil etish bo‘yicha tajriba almashildi.

Safar doirasida Cheonan shahrida joylashgan “Shiitake Mushroom Farm” xo‘jaligiga ham tashrif buyurilib, shiitake qo‘ziqorinini yetishtirish texnologiyasi, zamonaviy laboratoriya sharoitlari, ishlab chiqarish jarayonlari va innovatsion yondashuvlar bilan yaqindan tanishildi.

Koreya Respublikasida qishloq xo‘jaligini modernizatsiya qilish, ishlab chiqarishda innovatsion texnologiyalardan foydalanish, ilm-fan va ishlab chiqarish integratsiyasini ta’minlash hamda yuqori qo‘shilgan qiymatga ega mahsulotlar yetishtirish borasidagi ilg‘or tajribalar alohida e’tibor markazida bo‘ldi.

Xizmat safari doirasida o‘tkazilgan uchrashuvlarda O‘zbekiston va Koreya o‘rtasidagi agrar sohadagi hamkorlikni hududiy darajada rivojlantirish, ilmiy-texnologik tajriba almashish, zamonaviy agrotexnologiyalarni joriy etish, yosh mutaxassislarning malakasini oshirish hamda istiqbolli investitsiyaviy loyihalarni amalga oshirish masalalari atroflicha muhokama qilindi.

Safar yakunida xususiy kompaniyalar hamda ilmiy-tadqiqot muassasalari o‘rtasida o‘zaro manfaatli hamkorlikni rivojlantirishga qaratilgan memorandumlar imzolandi. Shuningdek, kelgusida qo‘shma ilmiy-amaliy loyihalarni amalga oshirish, tajriba almashish va zamonaviy texnologiyalarni O‘zbekiston qishloq xo‘jaligiga tatbiq etish bo‘yicha qat’iy kelishuvlarga erishildi.

Прокрутить вверх